Baydhabo,(insidesomalia.org)-Guddoomiyaha Baarlamanka Federaalka KMG ah ee Soomaaliya Sheekh Aadan Maxamed Nuur Madoobe ayaa ku amray Xildhibaanada Baarlamanka in ay si deg deg ah u soo diiwaan geliyaan tirada ilaaladooda gaarka ah ee ay leeyihin iyo Hubka ay heystaan intuba si loo diiwaan geliyo.

Sheekh Aadan Madoobe ayaa intaa ku daray in arintan ujeedada laga leeyahay ay tahay sidii loo ogaan lahaa cida ka dambeysa xasilooni darida ka taagan Mudooyinkan dambe Magaalada Baydhabo, isla markaana wax looga qaban lahaa nabadgelyo xumida Magaaladaasi hareysay.

Qaar ka mid ah Xldhibaanada Baarlamka Soomaaliya ayaa lagu soo waramayaa in ay soo jeedinta ka timid Sheekh Aadan Madoobe ku tilmaameen mid khalad ah, waxayna xuseen xasiloonidarada ka taagan Magaalada Baydhabo in ay tahay mid salka ku heysa khilaafka siyaasadeed ee ka taagan Dalka Soomaaliya ee u dhexeeya Cidamada Dowladda iyo kuwa Itoobiya iyo kooxaha ka soo horjeeda oo haatana aysan jirin wax iyaga dhinacooda farta loogu soo godo

Magaalada Baydhabo ayaa muddooyinkii ugu dambeeyey waxay wehel u noqotay dilal iyo qaraxyo lala beegsanayo Saraakiisha iyo Ciidamada Dowladda federaalka iyo kuwa Itoobiya ee jooga Magaalada Baydhabo, waxaana dhacdadii ugu dambeysay ay halkaasi ka dhacday maalmo ka hor, ka dib markii tacshiirad ay fureen Ciidamada Itoobiya ay ku dhinteen ku dhowaad 15 ruux, taasoo ka dambeysay Qarax lala beegsadey Ciidamada Itoobiya oo ay kaga geeriyoodeen labo askari.